अभिनेता पल शाहलाई अदालतको सफाइ, सोमवार जेलमुक्त हुने

सरल इन्टरटेन्मेन्ट

Home
सरल इन्टरटेन्मेन्ट
अभिनेता पल शाहलाई अदालतको सफाइ, सोमवार जेलमुक्त हुने

अभिनेता पल शाहलाई अदालतको सफाइ, सोमवार जेलमुक्त हुने

सरलरेखा संवाददाता आइतबार, फागुन १४, २०७९

काठमाडौँ । नाबालिगमाथि जबरजस्ती करणीको मुद्दा खेपिरहेका कलाकार पल शाहले उच्च अदालत पोखराबाट सफाइ पाएका छन् । न्यायाधीशद्वय डिल्लीराज आचार्य र श्रीधराकुमारी पुडासैनीको संयुक्त इजलासले आइतबार सफाइ दिएको हो ।

अभियोग दाबी नपुग्ने भन्दै अदालतले उनलाई सफाइ दिएको हो । अदालतले सफाइ दिएपछि शाह अब जेलमुक्त हुनेछन् । सम्भवतः उनी सोमवार जेलमुक्त हुने बताइएको छ ।

नाबालिग बलात्कार आरोपमा जिल्ला अदालत नवलपुरको फैसलाविरुद्ध उनले उच्च अदालतमा रिट दायर गरेका थिए ।

यसअघि माघ ३ गते तनहुँ जिल्ला अदालतले अभिनेता शाहलाई सफाइ दिएको थियो । न्यायाधीश कोमलप्रसाद आचार्यको इजलासले शाहमाथिको अभियोग दाबी नपुग्ने ठहर गर्दै शाहलाई सफाइ दिएका थिए ।

तनहुँ जिल्ला अदालतले बलात्कारको कसुरमा शाहलाई सफाइ दिए पनि उनी थुनामुक्त हुन पाएका थिएनन् । नवलपुर जिल्ला अदालतले शाहलाई बलात्कारको मुद्दामा सफाइ दिए पनि बाल यौन दुरुपयोगमा दोषी ठहर गर्दै साढे २ वर्षको कैद सजाय र दश लाख रुपैयाँ क्षतिपूर्तिको फैसला सुनाएको थियो ।

एक नाबालिगमाथि बलात्कार गरेको भन्दै जाहेरी परेपछि अभिनेता पल शाह गत वर्षको फागुन ११ गते जिल्ला प्रहरी कार्यालय तनहुँमा जाहेरी परेको थियो । जाहेरी परेको ४ दिनपछि २०७८ फागुन १५ गते शाहले प्रहरीसमक्ष आत्मसमर्पण गरेका थिए ।

प्रकाशित मिति: आइतबार, फागुन १४, २०७९ १८:३९

प्रतिक्रिया दिनुहोस्