मेलबर्न। अष्ट्रेलियाको भिक्टोरियामा जारी १७औं ग्रेस न्याभ टुर्नामेन्टका नियमित खेल सम्पन्न भइसकेका छन्। टुर्नामेन्ट गत १६ जनवरीदेखि सुरु भएको थियो। १७औं ग्रेस न्याभ क्रिकेट टुर्नामेन्ट ट्रफीका लागि २७ फेब्रुअरी, आइतबार फाइनल खेल हुँदैछ। दश टिमको सहभागिता र च्यारिटी म्याचले यसपटकको टुर्नामेन्टमा उत्साह थपेको छ। त्यसमाथि पनि आयोजक संस्था नेपलीज एसोसिएसन अफ भिक्टोरिया (न्याभ) यसपटक राज्य जयन्ती मनाउंदै छ, जसले गर्दा टुर्नामेन्ट अझ विशेष बनिरहेको छ।
यसै सन्दर्भमा रहेर आज हामीले ग्रेस इन्टरनेशनल ग्रुपका प्रबन्ध निर्देशक रामचन्द्र पौडेलसंग विशेष कुराकानी गरेका छौं। ग्रेस इन्टरनेशनल न्याभ क्रिकेट टुर्नामेन्टको मूख्य प्रायोजक संस्था हो।
ग्रेस इन्टरनेशनल कहिले सुरु भएको हो र कसरी काम गरिरहेको छ ?
ग्रेस इन्टरनेशनल नेपालमा २००६ मा स्थापना भएको थियो। विभिन्न देशमा अध्ययन गर्न चाहने विद्यार्थीलाई सेवा प्रदान गर्ने क्रममा अष्ट्रेलियाको मेलबर्नमा २०१५ मा रिजनल अफिस स्थापना गर्यौं। अधिकांश कन्सल्टेन्सीहरु पहिले अष्ट्रेलियामा संचालन गरेर पछि नेपालमा शाखा खोलिएका छन्, तर हामीले भने हाम्रो मातृभूमीबाट नै काम सुरु गरेका हौँ। हामीमाथि विद्यार्थी र अभिभावकको विश्वास बढ्दै गएपछि अष्ट्रेलियामा सुरु गर्यौं र अहिले त विभिन्न देश तथा सहरमा गरेर हाम्रा कार्यालयहरु २२ वटा रहेका छन्। अष्ट्रेलियामै पनि मूख्य सहरहरु मेलबर्न, सिड्नी, एडिलेड, पर्थ, ब्रिसबेन, होबर्ट, क्यानबेरामा हाम्रा कार्यालयहरु छन्। अहिले नेपाल सहित ४ देशमा हाम्रा कार्यालय रहेका छन्। हामीकहाँ नेपाली मात्र होइन, फिलिपिनो, भियतनामी, भारतीय, पाकिस्तानी लगायत अन्य देशका सेवाग्राही पनि आउनुहुन्छ। उहाँहरुले गर्नुभएको यो विश्वासलाई कायम राख्दै, सहज तथा छरितो सेवाका लागि ग्रेस प्रतिबद्ध छ।
यो व्यवसायिक क्षेत्रमा अरु थुप्रै संस्था पनि हुनुहुन्छ, ग्रेस चाहिं के कुरामा पृथक छ ?
हामीले विद्यार्थीलाई यो पढ्नुस्, यो देश जानुस् भनेर तोक्दैनौं। हामीकहाँ आउने विद्यार्थीको भविष्य उज्ज्वल बनोस् भन्ने सधै हाम्रो चाहना हुन्छ। त्यसैले विद्यार्थीले पढ्न चाहेको विषय कुन, त्यो विषयमा सभावना केकस्तो छ, विद्यार्थी कुन देश जान चाहेको हो भन्ने सबैकुरा बुझेर हामीले करियर काउन्सिलिङ्ग गर्छौं। र, विद्यार्थीलाई मात्र होइन, अभिभावकलाई पनि काउन्सिलिङ्ग गर्छौं। विदेश गएको छ भनेपछि अधिकांश अभिभावकले सन्तानबाट धेरै आशा राख्नुहुन्छ, जसले गर्दा विद्यार्थीमा एक किसिमको दबाब सिर्जना हुन्छ र उसको करियरमै अवसर पर्छ। त्यो कुरालाई बुझेर हामीले अभिभावकलाई पनि काउन्सिलिङ्ग दिन सुरु गरेका हौँ। अर्को कुरा, हाम्रोमा रजिस्टर्ड माइग्रेसन एजेन्टको टिम नै छ। त्यसैले विद्यार्थीले सही सुझाव प्राप्त गर्न सक्छन्।
न्याभ क्रिकेट टुर्नामेन्टमा कहिलेदेखि आबद्ध हुनुहुन्छ ?
ग्रेसको स्थापनाकालदेखि नै टुर्नामेन्टमा सहकार्य गरिरहेका छौं। सबै कुरा व्यवसायिक मात्र हुँदैन। व्यवसाय आफ्नो ठाउँमा छ। समुदायप्रति पनि हाम्रो उत्तरदायित्व हुन्छ। न्याभ कप मार्फत हामीले नेपाली समुदायका युवाहरुलाई प्रोत्साहन गर्न सकेका छौं। अर्कोतर्फ, न्याभ भिक्टोरियावासी नेपालीहरुको पूरानो संस्था हो। नेपाली समुदायलाई विभिन्न क्षेत्रमा अगाडी बढाउनको लागि प्रयासरत यो संस्थाले खेल क्षेत्रमा गरेको प्रयास प्रशंसनीय छ। त्यसैले न्याभकपमा मूख्य प्रायोजकको रुपमा जोडिन पाउनु हाम्रो लागि खुशीको कुरा हो।
नेपाली समुदायमा न्याभ टुर्नामेन्टको स्थान कस्तो देख्नुहुन्छ ?
यहाँ नेपालीहरुका विभिन्न संस्था छन्, कसैले कुनै ठाउँको, कसैले कुनै जाती विशेषको प्रतिनिधित्व गर्छन्। तर न्याभ एउटा यस्तो संस्था हो, जसले भिक्टोरियावासी हरेक नेपालीको प्रतिनिधित्व गर्छ। यहाँको हरेक नेपाली व्यक्ति र हरेक नेपाली संस्थाको यो अभिभावक हो। र, टुर्नामेन्टले पनि त्यसरी नै यहाँको हरेक नेपालीलाई जोड्ने काम गरेको छ। अहिले त झन् नेपाली बहुसांस्कृतिक केन्द्रका लागि च्यारिटी म्याच गरेकोले यसको महत्त्व बढेको छ।
१७औं सिजनसम्म आइपुग्दा पहिलेको र अहिलेको टुर्नामेन्टमा के फरक पाउनुभएको छ ?
पहिले क्लबहरु थोरै थिए। त्यसमध्ये एउटा क्लबको दुईवटा टिम बन्न पनि मुस्किल पर्थ्यो। अहिले त भिन्न-भिन्न क्लबका दश टिम सहभागी भए। खेलाडीहरुले खेल्दा मैत्रीपूर्ण तरिकाले खेलिरहेका छन्। उनीहरुको प्रदर्शन पनि अघिल्ला वर्षहरुमा भन्दा निखारींदै आएको महसुस गर्न सकिन्छ। अर्कोतिर, च्यारिटी म्याचले गर्दा सहभागिता बढेको छ। च्यारिटी म्याचले सबैमा छुट्टै किसिमको ऊर्जा भरिदिएको छ। र, महत्त्वपूर्ण कुरा, नेपाली समुदायका लागि लकडाउन पछिको यो सबैभन्दा ठूलो इभेन्ट भएका कारण यो एउटा पर्व जस्तो बनिरहेको छ। टुर्नामेन्टलाई यसरी व्यवस्थित र सफल बनाउन टुर्नामेन्ट संयोजक प्रेम राज उप्रेतीजी र उहाँको टिम जसरी लागेको छ, प्रशंसनीय छ।
न्याभ कपमा उत्कृष्ट खेल प्रस्तुति गरिरहेका खेलाडीहरु योभन्दा अगाडी बढ्न सक्ने सम्भावना कत्तिको देख्नुहुन्छ?
अगाडी बढ्नुपर्छ र भविष्य पनि राम्रो छ। तर त्यसको लागि खेलाडीहरुलाई हामीले साथ दिनुपर्छ। न्याभले पनि न्याभ कप भन्दा अझ माथिका अवसरहरु सिर्जना गर्नुपर्छ। त्यसको लागि न्याभलाई सहयोग गर्न हामी सधै तयार छौं। अर्कोतिर, खेलमा मात्र नभएर अन्य सबै कुरामा विद्यार्थीका लागि टुर्नामेन्ट एउटा राम्रो प्लाटफर्म बन्न सक्छ। त्यहाँ, विभिन्न व्यक्तिहरुसंग कुरा गर्ने, घुलमिल हुने, सम्बन्ध विस्तार गर्ने वातावरण मिल्छ। त्यसबाट उनीहरुलाई पढाइ तथा काममा पनि सहयोग मिल्न सक्छ।
न्याभ कपमा खेलाडीहरुलाई प्रोत्साहन गर्न ग्रेस इन्टरनेशनलले गरेका प्रयासबारे बताइदिनुहोस् न!
न्याभ कपमा प्रमुख त ग्रेस इन्टरनेशनलले मूख्य प्रायोजकको रुपमा सहयोग गरिरहेको छ। खेलाडीहरुका लागि यो अप्रत्यक्ष सहयोग भयो। प्रत्यक्ष सहयोग भनेको, हामीले म्यान अफ द म्याचलाई २५० डलरको डिस्काउण्ट भौचर उपहार स्वरुप राखेका छौं। हामीले च्यारिटी खेलका लागि पनि सबै टिमका खेलाडीहरुलाई पोशाक उपलब्ध गराएका छौं। त्यस्तै, न्याभ कपमा खेल्ने विद्यार्थी खेलाडीहरुलाई पढाइ तथा भिसामा कसरी सहयोगी भूमिका खेल्न सकिन्छ भनेर हामी सधै प्रयासरत छौं।
टुर्नामेन्टलाई अझ बृहत बनाउनका लागि के गर्नुपर्ला ?
नेपाली समुदायका हरेक व्यवसायीलाई जोड्नका लागि म आयोजक टिमलाई विशेष सुझाव दिन चाहन्छु। त्यसले गर्दा एउटा त सहभागिता बढ्छ, टुर्नामेन्टप्रति सबैको चासो रहन्छ भने अर्कोतिर, आर्थिक सहायता पनि जुट्छ। टाइटल स्पोन्सर भनेर ग्रेस नै रहनु जरुरी छैन, हामी सबै मिलेर, अगाडी देखिएर यसलाई बृहत बनाउन सक्छौं।
नेपाली व्यवसायीको कुरा गर्दा, यहाँ कस्ता चुनौती र अवसर अनुभव गर्नुभएको छ ?
यहाँ अवसर धेरै छ, तर चुनौती पनि छ। ठाउँ अनुसार अवसर र चुनौती फरक-फरक हुन्छन्। यहाँ नियम एकदमै कडा छ। इमान्दार हुनुपर्छ ।आफू इलगनशील हुनुपर्यो, अवसर भेटिन्छन्।
अन्त्यमा केही भन्ने चाहनुहुन्छ कि?
ग्रेस इन्टरनेशल १६औं वर्षमा प्रवेश गरेको छ। यो सबै विद्यार्थी, अभिभावक लगायत हाम्रा सम्पूर्ण सेवाग्राही, हाम्रा शुभेच्छुकको साथ तथा माया र सम्पूर्ण टिम सदस्यको मेहनतले सम्भव भएको हो। यसका लागि सबैप्रति आभारी छु। हजुरहरुको यो साथ निरन्तर रहोस् र ग्रेसले सयौं वार्षिकोत्सव मनाउने अवसर पाओस् ।
-1722510781.jpg)
