आजभन्दा २८ वर्षअगाडि एउटा लोकपप ब्याण्डको उदय भयो । छोटो समयमा नै लोकप्रिया कमाउँदै उक्त व्याण्ड युवाहरुको ढुकढुकी बन्न पुग्यो। लोकपपसँगै मेलोडी गीतहरु पनि त्यसरी नै कुना–कन्दरासम्म वेजोड गुन्जिरहँदा ब्याण्ड ‘कन्दरा’ को चर्च सगरमाथा झैँ चुलिन थाल्यो । हरेक उमेरका, हरेक ठाउँमा बसोवास गर्ने नेपाली भाषीहरुका लागि ब्याण्ड सांगीतिक वरदान बन्यो, जसबाट अष्ट्रेलिया पनि अछुतो रहन सकेन ।
नेपाल फेस्टिबल मेलबर्नको निमन्त्रणामा २०१६ डिसेम्बरमा कन्दरा ब्याण्ड आफ्नो प्रस्तुति दिन स्टेज चढ्यो र व्याण्डका लेजेण्ड भोकलिष्ट विवेक श्रेष्ठले माइक समातेर हेलो मेलबर्न मात्रै के भनेका थिए फेडेरेसन स्क्वारको त्यो विशाल भीड खुशीले चिच्यायो । जब गायक श्रेष्ठले आफ्ना एकपछि अर्को कालजयी गीतहरु पस्कन थाले त्यसपछि माहोल झन् चम्किन थाल्यो । उनै लेजेण्ड गायक विवेक श्रेष्ठसँग उक्त क्षणको अनुभवका बारेमा गरिएको संक्षिप्त कुराकानी:
पछिल्लो समय मेलबर्नलाई कर्मथलो बनाउनुभएको छ । सम्रगमा मेल्वर्न कस्तो लाग्छ ?
मेलबर्न संसारमा बस्न लायक ठाउँमध्ये एउटा रहेको छ र यो अनुभव मलाई २०१२ मा मेलबर्न आउँदा नै भएको थियो । त्यतिखेर नै मैले यो शहरलाई भविष्यमा कर्मथलो बनाउँछु भन्ने कल्पना गरिसकेको थिएँ । र यो कल्पना अहिले साकार पनि भएको छ । कहिलेकाहीं यहाँको मौसमले सताएपनि यहाँका मानिसहरुको हार्दिकताले भने अपनत्व महसुस हुन्छ। पक्कै पनि मेलबर्नको सुन्दरताले मन छोएको छ।
२०१६ डिसेम्बर मा आयोजित नेपाल फेस्टिबल मेलबर्नमा प्रस्तुति दिनुभएको थियो । उक्त प्रस्तुतिलाई नेपाल फेस्टिवल मेलबर्नको यादगार क्षणको रुपमा लिइन्छ, हजुरले चाहिं त्यो क्षणलाई अहिले कसरी सम्झनुहुन्छ ?
हाम्रा लागि पनि उक्त वर्षको नेपाल फेस्टिबल विभिन्न कारणले यादगार छ । अष्ट्रेलियाका लागि कन्दरा व्याण्डको पहिलो पल्टको टूर र प्रस्तुती थियो त्यो। मेलबर्न लगायत अष्ट्रेलिया अन्य शहरहरुमा पनि हामीले प्रस्तुती दिएका थियौ त्यतिखेर । फेडेरेशन स्क्वायरमा हाम्रो प्रस्तुती र दर्शकहरुको उपस्थिती त भव्य छँदै थियो, त्यो लेभलको फ्यानको माया र सद्भाव अविसमरणीय छ । अनि त्यो भन्दा पनि अझ स्पेशल रुपमा भन्दा मैले त्यो दिन मेरो जीवनसँगीनीलाई स्टेजबाट पहिलोपटक देखेको थिएँ । मैले त्यो दिनै उनीसँगै भेटेँ । त्यसैले पनि २०१६ को नेपाल फेस्टिबल मेरो लागि यादगार रहिरह्यो।
नेपाल फेस्टिबल मेल्वर्नमा प्रस्तुती दिंदै गर्दा कस्तो अनुभव गर्नुभएको थियो?
हरेक गायक, संगीतकार, ब्याण्डको एउटा सपना हुन्छ, ठूलो भीडमा म्यूजिकल कन्सर्ट गर्ने । हामी कन्दरा व्याण्डले पनि त्यो दिन फेडेरेसन स्क्वायरमा आँखाले भ्याउन्जेलको भीडमा प्रस्तुती दिन पाएका थियौ । त्यो सपना पूरा भएकोमा खुशी सँगसँगै अलि भावुक पनि भएको थिएँ। एनआरएनए भिक्टोरीया तथा नेपाल फेस्टिबल व्यवस्थापक टिमप्रति त्यो अवसरको लागि ह्दयदेखिनै धन्यवाद दिएँ । यस वर्ष पनि हामीलाई प्रस्तुतीको प्रस्ताव चाँहि आएको थियो तर केही कारणवश हामीले यो वर्ष प्रस्तुती दिन नसक्ने भएका छौ । अरु देशभन्दा अष्ट्रेलियाले कलाकारहरुलाई बढी सम्मान दिएको महसुस गरेको छु।
स्टेजमा लेककी हे माया गाउँदा गाउँदै मेल्वर्नकी मायासँग मायाप्रिति भएछ, समग्रमा नेपाल फेस्टिबल मेलबर्नलाई कसरी लिनुहुन्छ?
पक्कै पनि यसको श्रेय नेपाल फेस्टिबल लगायत एनआरएनए भिक्टोरीयाको टिमलाई जान्छ । फेरिपनि धन्यवाद भन्न चाहन्छु । र, नेपाल फेस्टिवलको नै कुरा गर्दा चाहिं एकदमै भव्य अनि व्यवस्थित पनि । मेलबर्नको मुटुमा रहेको फेडेरेशन स्क्वायरमा दिनभरी पचास हजार भन्दा बढी मानिसहरुलाई आफ्नो कला संस्कृती र भेषभूषाले तान्न सक्ने एउटा ठूले साँस्कृतिक फेस्टिबल हो । यस फेस्टिबलले नेपाली कला, संस्कृति, भाषा, नृत्य, भेषभूषालाई मात्रै नभइ नेपाली संगीतलाई पनि उच्च स्थान र अवसर दिएको छ त्यसैले पनि म यस फेस्टिबललाई विशेष रुपमा लिन्छु ।
लामो समय बेलायतमा पनि बसेर आउनुभयो । त्यहाँको नेपाल फेस्टिबलहरुमा पनि सहभागि हुनुभयो होला । त्यहाँ र यहाँमा कस्ता समानता र भिन्नता पाउनुभयो ?
नेपालको कला संस्कृति, संगीत झल्काउने एउटै उद्देश्य रहेकोले यसलाई समानताको रुपमा हेर्न सकिन्छ । डायस्पोरामा बस्नेहरु सबैले सानो नेपालको निर्माण गरेर नेपालीपन महसुस गराउने गरेको छ त्यसैले पनि उद्देश्यमा समानता रहेको छ तर फेस्टिबलको व्यवस्थापन गर्ने तरिकामा अलि भिन्नता हुन सक्ला । म पनि एउटा एनआरएन हुँ त्यसैले पनि म अरुसँग काम गर्दा आफूपनि रहेर काम गरेको महसुस गर्दछु । हामी सबै मिलेर काम गर्ने हो र हामी सबैले मिलेर गरेको काम र सहकार्य राम्रो लाग्दछ ।
नेपाल फेस्टिबल मेल्वर्न सफल बनाउन आयोजकलाई आफ्नो तर्फबाट केही सुझाव दिन चाहनुहुन्छ कि?
फेस्टिवलको आयोजकहरु धेरै नै अनुभवी हुनुहन्छ । उहाँहरुलाई के के कुरामा ध्यान दिनुपर्छ भनेर धेरै ज्ञान पनि छ । कला र संस्कृतिको विविधतामा अझै जोड दिन सकिन्छ यसवर्ष । लामो लकडाउन र तिव्र कोभिडको महामारी पछि यति वृहत कार्यक्रम भएरहेको छ । कोभिडको संक्रमण अझैपनि समुदायमा यथावत रहेकोले कोभिडको नियम पालना गरेर फेस्टिवलमा सहभागि हुनुपर्छ जस्तो लाग्छ । जस्तै सकेसम्म मास्क लगाउने, स्यानिटाइजर लगाउन नभुल्ने । यो सँगै फेस्टिवलको दिन वरीपरीको पब, क्लबहरु व्यस्त हुन सक्ला, मदिरा सेवन गरेर दुर्घटना हुनसक्ने सम्भावना पनि धेरै हुनसक्ला, त्यसैले यसमा पनि विशेष ध्यान दिनुपर्छ । आयोजक टिमलाई अग्रीम बधाई तथा शुभकामना दिन चाहन्छु ।
अन्त्यमा, आफ्ना प्रशंसकलाई के संदेश दिन चाहनुहुन्छ?
कन्दरा व्याण्डले अब विस्तारै नयाँ नयाँ गीतहरुपनि ल्याउने तयारीमा रहेको छ । त्यसको लागि पनि म नेपाल जाँदैछु । हामीलाई यति धेरै माया र अपनत्व दिनुभएकोमा सबैप्रति आभार छौ ।
-1722510781.jpg)
