मेलबर्न। अष्ट्रेलियाको मेलबर्नमा १७औं न्याभ क्रिकेट टुर्नामेन्ट चलिरहेको छ। नेपलीज एसोसिएस अफ भिक्टोरिया (न्याभ)ले आफ्नो वार्षिकोत्सवको अवसरमा आयोजना गर्दै आएको टुर्नामेन्ट यसपटक १६ जनवरीदेखि सुरु भएको हो। हरेक हप्ताको आइतबार हुँदै आएको टुर्नामेन्टका खेल सकिएका छन्। न्याभ क्रिकेट टुर्नामेन्टमा यस पटक १० टिम सहभागी रहेका थिए । आगामी आइतबार १७औं न्याभ क्रिकेट टुर्नामेन्टको फाइनल खेल हुँदैछ।
टुर्नामेन्टमा यस पटक च्यारिटी खेल पनि रहेको छ। व्यवसायी तथा समुदायका अगुवाहरुको च्यारिटी म्याचको फाइनल खेल पनि आगामी आइतबार नै हुनेछ। नेपाली बहुसांस्कृतिक केन्द्र (एएनएमसी) को सहयोगार्थ च्यारिटी खेल आयोजना गरिएको हो। यसै सेरोफेरोमा रहेर आज हामीले जेन माइग्रेसन एण्ड एजुकेशन सर्भिसेजका डाइरेक्टर सुरज खत्रीसंग विशेष कुराकानी गरेका छौं।
यो व्यवसायिक क्षेत्रमा कसरी आइपुग्नुभयो?
सुरुमा म आइटि पढ्नका लागि अष्ट्रेलिया आएको हूँ। १९९९ मा अष्ट्रेलिया आएँ अनि आफ्नो रोजाईको विषय पनि पढें, त्यहिबीचमा माइग्रेसन लप्रति आकर्षित भएँ। र, ग्राजुएट सर्टिफिकेट इन इमिग्रेसन ल पढें। त्यसपछि मैले केही समय डिपार्टमेन्ट अफ इमिग्रेसनमा काम गरेँ। पढाइ अनि त्यो अनुभवले रजिस्टर्ड माइग्रेसन एजेन्ट बनें। यहाँको नेपाली समुदायमा पूराना रजिस्टर्ड माइग्रेसन मध्येमा पर्छु म। काम गर्दै जाँदा मैले इमिग्रेसन ल मै मास्टर्स पनि गरें। यो व्यवसायिक क्षेत्रमै काम गर्नेहरुमा इमिग्रेसन ल मै मास्टर्स गर्ने धेरै कम छौं। काम गरिसकेपछि आफूमा धेरैभन्दा धेरै ज्ञान होस्, जसले गर्दा गुणस्तरीय तथा विश्वासीलो सेवा प्रदान गर्न सकौं भन्ने मेरो मान्यता छ। भिसा सम्बन्धि एकदमै जटिल मानिएका समस्या पनि हामीले समाधान गरिरहेका छौं। त्यो समस्या समधानपछि सेवाग्राहीमा जुन खुसी देखिन्छ, त्यसले मलाई सबैभन्दा बढी आनन्द दिन्छ। जेन माइग्रेसन २०१५देखि संचालनमा आएको हो र अहिलेसम्म हजारौं सेवाग्राहीलाई सेवा दिइसकेका छौं। पैसाभन्दा त्यो खुसीलाई महत्त्व दिनेभएकै कारणले हामीमाथि सबैले विश्वास गरिरहनुभएको छ। जेन माइग्रेसनको नाम संस्कृत शब्द ध्यानबाट आएको हो, यसको अर्थ शान्ती भन्ने हुन्छ। यही नाम अनुसार, सबैको जीवनमा खुसी र शान्ती ल्याउन सकौं भन्ने हाम्रो उद्देश्य हो।
न्याभ टुर्नामेन्टमा कहिलेदेखि आबद्ध हुनुहुन्छ ?
न्याभ हाम्रो पूरानो संस्था हो। त्यसैले न्याभले गर्ने प्राय: कार्यक्रमहरुमा हाम्रो सहभागिता रहन्छ। हामी सबैको साझा संस्था भएकोले यसले गर्ने गतिविधिमा सहभागी हुनु, सहयोग गर्नु हाम्रो दायित्व हो। अहिले त म सल्लाहकारको रुपमा समेत रहेको छु। न्याभसंग यसरी जोडिन पाउँदा गर्व लाग्छ।
भिक्टोरियाको नेपाली समुदायमा न्याभ टुर्नामेन्टको स्थान कस्तो देख्नुहुन्छ ?
क्रिकेट खेल हामी नेपालीहरुका लागि प्यारो छ। त्यसमा पनि समुदायकै ठूलो टुर्नामेन्ट भएका कारण सबैमा उत्साह देखिन्छ। यहाँको बहुसांस्कृतिक समुदायमा नेपाली समुदायको स्थान बनाउनका लागि न्याभ क्रिकेट टुर्नामेन्टले पनि ठूलो भूमिका खेल्न सक्छ जस्तो लाग्छ। यसपटक त बृहत च्यारिटी म्याचले समुदायमा अझ ठूलो रौनक ल्यायो।
च्यारिटी म्याच खेल्दाको अनुभव बताइदिनुहोस् न !
सबैभन्दा पहिले त म टुर्नामेन्ट संयोजक प्रेम राज उप्रेतीजीलाई धेरै-धेरै धन्यवाद अनि बधाई दिन चाहन्छु। उहाँले जसरी यति ठूलो म्याचको व्यवस्थापन गर्नुभयो, निकै प्रशंसनीय छ। आ-आफ्नो काम र व्यवसायमा व्यस्त भएकाहरुलाई यसरी जम्मा गर्न सक्नु, खेल्नका लागि प्रेरित गर्नु चानचुने कुरा होइन। हामी आफ्नो दैनिक जिन्दगीमा अल्झिएर खेल्न बिर्सिएकाहरुलाई च्यारिटी म्याचले नयाँ जोश दियो। यसरी खेल्यौं कि, अर्को दिन शरीरका अंग-अंग दुखेका थिए। हामीले आफूलाई बिर्सिएर खेल्यौं। म्याचले छुट्टै किसिमको ऊर्जाको संचार गरिदियो। कोभिड पछाडीको सबैभन्दा ठूलो इभेन्ट भएका कारण सबैसंग भेटघाट गर्ने, गफ गर्ने अवसर समेत मिल्यो। त्यसमाथि नेपाली बहुसांस्कृतिक केन्द्र निर्माणका लागि गरिएको यो च्यारिटी म्याचको उद्देश्य आफैमा सुन्दर छ। अब आइतबार हुने खेलका लागि हामी सबै उत्साहित छौं।
न्याभ टुर्नामेन्टले नेपाली समुदायका युवाहरुलाई कसरी सहयोग गर्न सक्छ ?
खेलले शारीरिक र मानसिक दुवै किसिमले स्वस्थ रहन मद्दत गर्छ। यो निकै महत्त्वपूर्ण छ। अर्को कुरा, टुर्नामेन्टमा खेलाडीले आफ्नो क्षमता प्रस्तुत गर्न, सिक्न सक्छ र अगाडी बढ्ने बाटो निर्माण गर्न पनि सक्छ। त्यसैगरी सम्बन्धि विस्तार, आफ्नो आइडिया तथा कामको प्रचारका लागि पनि टुर्नामेन्टले राम्रो प्लाटफर्म दिइरहेको छ।
टुर्नामेन्टलाई अझै व्यापक र राम्रो बनाउनका लागि के गर्नुपर्ला ?
पहिलो कुरा त न्याभको सदस्यता संख्या बढाउनुपर्छ। अर्को कुरा, महिला सहभागितालाई अब ध्यानमा राख्नुपर्छ। महिला र बालबालिकालाई पनि समेट्न सकियो भने यो अझै बढी सहभागितामूलक बन्नेछ। र संगसंगै व्यापक प्रचार-प्रसारमा पनि ध्यान दिनुपर्छ। यसका लागि समुदायका हामी सबैले सक्दो साथ दिनुपर्छ।
अन्त्यमा, अष्ट्रेलियामा नेपाली व्यवसायीहरुका लागि कस्ता चुनौती र अवसर रहेका छन् ?
यहाँ अवसर धेरै छन्। कोभिडको समयमा समेत सरकारले व्यवसायीहरुलाई सहयोग गरेको थियो। अरु कुरा त आफ्नो मेहनत, क्षमता, लगनशीलता र इमान्दारितामा भर पर्छ।
-1722510781.jpg)
