मेलबर्न। अष्ट्रेलियाको भिक्टोरियावासी नेपाली समुदायको सबैभन्दा पूरानो संस्था नेपलीज एसोसिएसन अफ भिक्टोरिया (न्याभ) ले २५ वर्ष पूरा गरेको छ। रजत जयन्ती मनाएसंगै न्याभले आगामी दुई वर्षका लागि नयाँ कार्यसमिति चयन गर्दैछ। आगामी २३ जुलाईमा वार्षिक साधारणसभा संगै नयाँ कार्यसमितिका लागि निर्वाचन हुनेभएको हो।
उक्त निर्वाचनबाट आगामी दुई वर्षका लागि न्याभका अध्यक्ष, उपाध्यक्ष, कोषाध्यक्ष र सदस्यहरुको चयन गरिनेछ। निर्वाचनका लागि उम्मेद्वारीको आव्हान गर्दै न्याभले निर्वाचन तालिका र मतदाता नामावली सार्वजनिक गरेको छ। न्याभको सदस्यता लिएका विद्यार्थी, साधारण सदस्य तथा आजीवन सदस्यहरुले मत दिन पाउनेछन्।
न्याभको निर्वाचन तालिका अनुसार, १४ जुलाईसम्ममा इच्छुक व्यक्तिहरुले उम्मेद्वारी दर्ता गरिसक्नुपर्नेछ। न्याभका वर्तमान उपाध्यक्ष प्रेम राज उप्रेतीले आज अध्यक्ष पदका लागि उम्मेद्वारी घोषणा गर्नुभएको छ। विदेशी भूमीमा पारिवारिक जिम्मेवारी र कामको चापले व्यस्त बन्ने जीवनशैलीमा उप्रेती सामाजिक काममा क्रियाशील रहँदै आउनुभएको छ। न्याभको वर्तमान कार्यसमितिको कार्यकालको समय कोभिड-१९ महामारीमा रह्यो। उक्त महामारीमा विद्यार्थीका लागि राहत वितरण, समुदायमा भ्याक्सिन सम्बन्धि जनचेतना कार्यक्रममा उहाँले संयोजक समेत रहँदै अंग्रपंक्तिमा रहेर काम गर्नुभएको थियो।
शान्ती, सद्भाव र एकताले नै समुदायलाई अगाडी बढाउँछ भन्ने मान्यता राख्ने उप्रेतीले सामुदायिक संस्थाको सहयोगका लागि व्यवसायिक संस्थाको हातेमालोलाई जोड दिंदै आउनुभएको छ। उहाँकै अवधारणामा न्याभ क्रिकेट टुर्नामेन्टमा सामुदायिक संस्था र व्यवसायिक संस्थाबीच मैत्रीपूर्ण च्यारिटी खेल सुरु भएको छ, जुन प्रयासलाई मेलबर्नको नेपाली समुदायले सह्राना गरेको छ। उक्त च्यारिटी खेलबाट एकातिर आपसी सद्भाव कायम राख्दै व्यवसायिक संस्था र सामुदायिक संस्थाबीच सहकार्य बढ्न सहयोग पुगेको छ भने अर्कोतिर सहयोग खाँचो रहेका व्यक्ति र संस्था समक्ष सहयोग रकम पुगेको छ।
यसपटक नेपाली टिमले भिक्टोरियाको फुटी टुर्नामेन्टमा सहभागी भई पदक जितेको थियो। यो नेपाली टिमको पहिलो सहभागिता थियो र यसको नेतृत्व न्याभका वर्तमान उपाध्यक्ष प्रेमराज उप्रेतीले नै गर्नुभएको थियो। कोभिडको चुनौतीपूर्ण समयमा पनि न्याभको क्रिकेट टुर्नामेन्ट व्यापक सहभागिताबीच सफलतापूर्वक सम्पन्न भएको थियो र यसको नेतृत्व उप्रेतीले नै गर्नुभएको थियो। त्यस्तै, उहाँकै संयोजकत्वमा आयोजित सकर टुर्नामेन्ट कोभिडको समयमा पनि बहुसांस्कृतिक तहमा सम्पन्न भएको थियो। कोभिडको समयमा सम्पन्न यी टुर्नामेन्टले समुदायलाई मानसिक र शारीरिक रुपमा स्फूर्ती प्रदान गर्दै सकारात्मक संदेश प्रवाह गरेका थिए।
आगामी कार्यकालका लागि अध्यक्ष पदको उम्मेद्वारी घोषणा गर्नुभएका उप्रेतीले खेललाई समेत शान्ति, सद्भाव, एकता र संस्कृतिसंग जोड्नुभएको छ। नेपाली परम्परा अनुसार क्रिकेट टुर्नामेन्टको उद्घाटन, टुर्नामेन्टमै खेलाडीहरुद्वारा सरस्वती पूजा, अष्ट्रेलिया दिवस कार्यक्रम अनुकरणीय बनेका छन्। उहाँ आफ्नो कार्यकालमा न्याभले आयोजना गर्ने खेलकुद टुर्नामेन्टको संयोजक रहँदै आउनुभएको छ।
उम्मेद्वारी घोषणा बारे जानकारी दिंदै प्रेम राज उप्रेती भन्नुहुन्छ," सामुदायिक कामका लागि जिम्मेवारी बहन गर्न पाउनुलाई म अवसर ठान्छु र त्यसलाई पूरा गर्नुलाई आफ्नो कर्तव्य ठान्छु। सानो बच्चा र कामको चापबीच पनि समुदायका कामहरुलाई प्राथमिकतामा राख्न मन पराउँछु। त्यसैकारणले गर्दा मैले अध्यक्ष पदमा उम्मेद्वारी दिने निर्णय गरेको हूँ। थप क्रियाशीलता तथा शान्ती, सद्भाव र एकता भन्ने मेरो अवधारणाका साथ मैले अध्यक्ष पदमा रहेर थप काम गर्न सक्छु, समुदायका लागि योगदान दिन सक्छु जस्तो मलाई लाग्छ। यसका लागि सबैको साथ चाहिन्छ। आजको दिनसम्म दिइरहनुभएको छ, सबैप्रति आभारी छु। यो साथ निरन्तर रहनेछ भन्ने अपेक्षा गरेको छु "।
न्याभको निर्वाचन आयोगले १४ जुलाईमा नै उम्मेद्वारी नामावली सार्वजनिक गर्ने जनाएको छ। उम्मेद्वारी नामावलीमा कुनै विमति भएमा १५ जुलाईमा निवेदन दिन सकिनेछ। उम्मेद्वारी फिर्ता गर्न चाहेमा १७ जुलाईमा निवेदन दिनुपर्नेछ। त्यसपछि उम्मेदवारको अन्तिम नामावली १९ जुलाईमा प्रकाशन हुनेछ।
-1722510781.jpg)
