आलोपालो सरकारको सुरसारः दुई दुई वर्ष देउवा र प्रचण्ड, एक वर्ष माधव नेपाल प्रधानमन्त्री

मूख्य समाचार

Home
मूख्य समाचार
आलोपालो सरकारको सुरसारः दुई दुई वर्ष देउवा र प्रचण्ड, एक वर्ष माधव नेपाल प्रधानमन्त्री

आलोपालो सरकारको सुरसारः दुई दुई वर्ष देउवा र प्रचण्ड, एक वर्ष माधव नेपाल प्रधानमन्त्री

सरलरेखा संवाददाता मंगलबार, मंसिर २०, २०७९

काठमाडौं । मंसिर ४ मा सम्पन्न प्रतिनिधिसभा तथा प्रदेशसभा निर्वाचनको सम्पूर्ण मतगणना सम्पन्न भएको छ ।

मंगलवार साँझ समानुपातिकतर्फको समेत मतगणना सकिएपछि मतमणना कार्य पूर्ण रुपमा सम्पन्न भएको निर्वाचन आयोगले जनाएको छ । मतपरिणाम अनुसार प्रत्यक्षतर्फ ५७ सिटसहित नेपाली काँग्रेस पहिलो दल बनेको छ । यस्तै ४४ सिटसहित नेकपा एमाले दोस्रो दलको हैसियतमा रहने भएको छ । १८ सिट जितेको नेकपा माओवादी केन्द्र तेस्रो र १० स्थान जितेको नेकपा एकीकृत समाजवादी पार्टी चौथो दल बन्न सफल भएको छ । कुनै दलले सरकार गठन गर्न आवश्यक बहुमत १३८ सिटमा जित्न नसकेपछि आगामी सरकार गठबन्धनकै हुने निश्चित भएको छ । कुन कुन दलबीच सत्ता गठबन्धन बन्छ भन्ने अहिले अनेक अड्कालबाजी भैरहेका छन् । दलका शीर्ष नेतृत्व पनि सरकार गठनको समीकरणको हिसाब कितावमा व्यस्त छन् ।

काँग्रेस लगायतका ठूला दलहरु आफ्नै नेतृत्वमा सरकार गठन गर्ने दाउमा छन् । सरकार गठनको समीकरण तयार पार्न काँग्रेस सभापति शेरबहादुर देउवाले वर्तमान सत्ता गठबन्धनका दलहरुबीच सोमवार साँझ छलफल गर्नुभएको छ । सत्ता सहयात्री दलहरुको मनासय बुझ्ने उदेश्यले डाकिएको बैठकमा नेकपा माओवादी केन्द्रका अध्यक्ष पुष्पकमल दाहाल, एकीकृत समाजवादीका अध्यक्ष माधवकुमार नेपाल, राष्ट्रिय जनमोर्चाका तर्फबाट दुर्गा पौडेलसहितका नेताहरु उपस्थित हुनुहुन्थ्यो । बैठकमा निर्वाचनको समीक्षा गर्नुका साथै आगामी सरकार गठनबारे समेत छलफल भएको थियो । एमालेसँग मिलेर माओवादी केन्द्रले वाम गठबन्धन गर्नसक्ने समाचार बाहिरिएपछि प्रधानमन्त्री देउवा सशंकित बन्नुभएको हो । सोमवारको बैठकमा उहाँले आगामी सरकारमा साथ दिनसक्ने या नसक्ने जवाफ यस या नोमा माग्नुभएको स्रोतको भनाइ छ । जवाफमा दाहाल र नेपालले आफूहरु पनि अहिलेकै गठबन्धनलाई निरन्तरता दिने पक्षमा रहेको तर त्यसका लागि प्याकेजमै सहमति हुनुपर्ने अडान राख्नुभएको थियो ।

विशेष गरेर सरकारको नेतृत्व र संवैधानिक पदहरुको बाँडफाँट सम्मानजनक हुनुपर्ने दाहाल र नेपालको आशय रहेको ती स्रोतले बतायो । स्रोतका अनुसार पहिलो २ वर्ष सरकारको नेतृत्व प्रधानमन्त्री शेरबहादुर देउवाले गर्ने र त्यसपछिको २ वर्ष दाहालले गर्ने आशय व्यक्त भएको छ । बाँकी एक वर्ष अर्थात चुनावी सरकारको नेतृत्व भने एकीकृत समाजवादीका अध्यक्ष नेपालले गर्ने अनौपचारिक चर्चा भएको छ ।

यस्तै संवैधानिक पदहरुमध्ये राष्ट्रपतिमा माओवादी केन्द्रले दाबी गरेको छ । अध्यक्ष दाहालले डा बाबुराम भट्टराईलाई वचन दिइसकेकोले राष्ट्रपतिमा दाबी गर्नुभएको स्रोतको भनाइ छ । यस्तै उपराष्ट्रपति एकीकृत समाजवादी,
राष्ट्रिय सभा अध्यक्ष कांग्रेस,उपसभामुख कांग्रेस,सभामुख माओवादी केन्द्र र राष्ट्रिय सभा उपाध्यक्ष एकीकृत समाजवादीले लिने गरी शीर्ष नेताहरुबीच प्रारम्भिक कुराकानी भैरहेको बताइएको छ ।

प्रकाशित मिति: मंगलबार, मंसिर २०, २०७९ २०:४१

प्रतिक्रिया दिनुहोस्