काठमाडौं । आगामी निर्वाचनमा मिलेर जाने निर्णय गरेको सत्ता गठबन्धनमा खटपट शुरु भएको छ ।
टिकट बाँडफाँडको सकस खेपिरहेको गठबन्धनमा विभिन्न जिल्लामा टिकटलाई लिएर खटपट शुरु भएको छ । सिन्धुपाल्चोकको क्षेत्र नम्बर–१ मा पनि गठबन्धनकै दलहरुबीच विवाद देखिएको छ । सिन्धुपाल्चोक क्षेत्र नम्बर–१ सभामुख तथा माओवादी केन्द्रका नेता अग्नीप्रसाद सापकोटाको चुनावी क्षेत्र हो । २०७४ सालको निर्वाचनमा सापकोटाका मूख्य प्रतिस्पर्धी नेपाली काँग्रेसका नेता तथा पूर्व सञ्चारमन्त्री मोहनबहादुर बस्नेत हुनुहुन्थ्यो ।
सिन्धुपाल्चोकका प्रभावशाली नेता बस्नेतको सशस्त्र द्वन्द्वको समयबाट नै माओवादीसँग राम्रो सम्बन्ध छैन । त्यसबेला उहाँले आफ्नो नेतृत्वमा युवा दस्ता नै गठन गरेर माओवादीलाई खोजी–खोजी कारबाही गर्ने घोषणा गर्नुभएको थियो । अहिले पनि माओवादी केन्द्रप्रति बस्नेतको दृष्टिकोणमा परिवर्तन आएको छैन । यसैकारण केन्द्रमा पार्टीले स्थानीय तह निर्वाचनमा माओवादी केन्द्र र एकीकृत समाजवादीसँग तालमेलको निर्णय गरेर देशभर गठबन्धन हुँदा समेत बस्नेता स्थानीय तहमा विपक्षमा उभिनुभएको थियो । बस्नेतले सिन्धुपाल्चोक–१ मा गठबन्धन नगर्ने घोषणा नै गर्नुभयो ।
सिन्धुपाल्चोक–१ मा बाह्रबिसे नगरपालिका, भोटेकोसी गाउँपालिका, त्रिपुरासुन्दरी गाउँपालिका, बलेफी गाउँपालिका, सुनकोशी गाउँपालिका, लिसंखुपाखर गाउँपालिका, जुगल गाउँपालिका र चौतारा साँगाचोकगढी नगरपालिकाको वडानम्बर–४ मा पर्छन् ।
यी सबै स्थानीय तहका वडामा पाएको मत हेर्दा नेपाली कांग्रेस सबैभन्दा ठूलो पार्टी बनेको छ । क्षेत्रभरीको सबै स्थानीय तहमा वडाध्यक्षले पाएको मत जोड्दा नेपाली कांग्रेस ३४ हजार ७६१ मतसहित पहिलो छ । २७ हजार ८०३ मतसहित एमाले दोस्रो छ । माओवादी केन्द्र कांग्रेसभन्दा झण्डै १६ हजार मतले पछाडि छ ।
यही मतका आधार बनाएर कांग्रेस नेता बस्नेतले सिन्धु्पाल्चोक–१ गठबन्धन गर्दा पनि माओवादीलाई छोड्न नसक्ने अडान लिदै आएका छन् । तर गठबन्धनमा सिट बाँडफाँट हुँदा यो क्षेत्र माओवादी केन्द्रका प्रभावशाली नेता तथा सभामुख अग्नी सापकोटाको भागमा पर्ने पक्कापक्की छ । यस्तो अवस्थामा काँग्रेस नेता बस्नेतले विद्रोह गर्ने र बागी उम्मेदवारी दिने सम्भावना बढेको छ ।
नेविसंघ महामन्त्री तथा सिन्धुपाल्चोकमा मोहन बस्नेत निकटका नेता बलदेव तिमिल्सिना सिन्धुपाल्चोक–१ कांग्रेसले छोड्ने र माओवादीले पाउने अवस्थामा नरहेको बताउँनुहुन्छ । कांग्रेसभन्दा माओवादी झण्डै १६ हजार मतले पछाडि छ । यसर्थ यो क्षेत्रमा नेपाली कांग्रेसले छोड्नुपर्ने र माओवादी केन्द्रले पाउनुपर्ने भन्ने आधार कसैगरी पनि न्यायोचित देखिँदैन, उहाँको भनाइ छ ।
माओवादीलाई दिए क्षेत्र नै विपक्षीको कब्जामा जाने अवस्था आएको उहाँको दाबी छ ।
तर, अग्निप्रसाद सापकोटा पक्ष भने बस्नेत पक्षले राखेको तर्क मान्न तयार छैन । सापकोटा निकटका नेता सुवोध सापकोटाले भोटमा केही कम भए पनि माओवादी एक्लाएक्लै चुनाव लड्न सक्ने अवस्था रहेको दाबी गर्नुहुन्छ । उहाँले सिन्धुपाल्चोक–१ यसअघि जितेका आधारमा माओवादीले नै पाउने भन्दै गठबन्धनबाट निर्णय भइसकेपछि बस्नेतले मात्र नमान्ने भन्ने नहुने तर्क गर्नुभयो ।
-1722510781.jpg)
