जापानका पूर्व प्रधानमन्त्री शिञ्जो आबेको हत्याबारे नयाँ खुलासा, अर्कै व्यक्ति थिए हत्याराको निशानामा

जापान सन्दर्भ

Home
जापान सन्दर्भ
जापानका पूर्व प्रधानमन्त्री शिञ्जो आबेको हत्याबारे नयाँ खुलासा, अर्कै व्यक्ति थिए हत्याराको निशानामा

जापान सन्दर्भ जापानका पूर्व प्रधानमन्त्री शिञ्जो आबेको हत्याबारे नयाँ खुलासा, अर्कै व्यक्ति थिए हत्याराको निशानामा

शिञ्जोको राजनीतिक विचारसँग आफ्नो कुनै विमति नरहेको हत्यारा यामागामीको बयान

टोक्यो । जापानका पूर्व प्रधानमन्त्री शिञ्जो आबेको शुक्रवार हत्या भएको छ ।

एक चुनावी सभामा सम्बोधन गरिरहेका बेला आबेमाथि गोली प्रहार भएको थियो । उनको हत्यालाई लिएर अहिले विभिन्न टिकाटिप्णी र आँकलनहरु भइरहेका छन् । यहीबीच उनको हत्याका बारेमा एउटा ठूलो खुलासा भएको छ । क्योदो न्यूजका अनुसार आबेमाथि गोली प्रहार गरेका युवकले हत्याको निशानामा आबे नभई अरु नै कुनै नेता रहेको खुलासा गरेका छन् । प्रहरीले बयान लिने क्रममा उनले आबेको नभई अरु नै कुनै व्यक्तिको हत्या गर्ने योजना बनाएको बताएका हुन् । उनले आबेभन्दा अघि कुनै ठूलो धार्मिक नेताको हत्या गर्ने योजना अनुसार तयारी समेत गरेको बयान दिएका छन् । तर ती धार्मिक नेताको नाम भने प्रहरीले खुलाएका छैनन् ।

को थिए निशानामा ?

आबेको हत्यारा यामागामीले प्रहरीलाई दिएको बयानमा उनी आबेभन्दा अघि एक धार्मिक नेताको हत्या गर्न चाहन्थे । ती धार्मिक नेताले उनको आमालाई धोका दिएको र त्यसैको बदलामा हत्या गर्न चाहेको यामागामीको बयानलाई उधृत गर्दै क्योदो समाचार एजेन्सीले जनाएको छ ।

शिञ्जोको हत्याको कारण

हत्यारा यामागामीका अनुसार ती धार्मिक नेता सम्बद्ध संगठनलाई आबेले देशभर प्रोमोट गरेका थिए । त्यसैले शिञ्जो आबेलाई पनि उनले निशाना बनाएका थिए । हत्याको योजना लिएर यसअघि पनि आबे सहभागी राजनीतिक र्याली र चुनावी सभामा समेत आफू गएको उनले बताए । तर उचित वातावरण नबन्दा आफू पछि हटेको उनको भनाइ छ । तर शिञ्जोको राजनीतिक विचारसँग आफ्नो कुनै विमति नरहेको उनले बयान दिएका छन् ।

जापानमा बन्दुक संस्कृति छैन

जापान शान्तिप्रेमीहरुको देश हो । त्यसैले यहाँ कुनै बन्दुक संस्कृति छैन । कतिसम्म भने कुनै प्रहरीले ड्युटीकै क्रममा कसैलाई बन्दुक देखाए मात्र पनि मिडियामा हंगामा मच्चिन्छ । अर्को कुरा जापानमा कडा कानूनका कारण आम जनताको बन्दुकमा पहूँच लगभग शून्य छ । बन्दुक राख्ने अनुमति यहाँ प्रशासनले विरलै मात्र दिन्छ । अर्थात कसैले बन्दुक राख्ने लाइसेन्स लिनपरे विभिन्न १३ चरण पार गर्नुपर्छ जुन अत्यन्त झन्झटिलो छ । यसकारण जापानमा बन्दुकसँग सम्बन्धित घटना अत्यन्त न्यून छ । पूर्व प्रधानमन्त्री आबेको हत्यामा प्रयोग भएको बन्दुक पनि प्रोफेसनल नभई घरमै बनाइएको घरेलु बन्दुक रहेको पुष्टि भएको छ । यस्तो बन्दुकलाई जिपगन भनिन्छ ।

प्रकाशित मिति: सोमबार, असार २७, २०७९ ११:४३

प्रतिक्रिया दिनुहोस्