काठमाडौं । भरतपुर महानगरपालिकामा नेपाली कांग्रेसबाट विद्रोह गरेर मेयरमा स्वतन्त्र उम्मेदवारी दिनुभएका जगन्नाथ पौडेलले प्रधानमन्त्रीसमेत रहेका सभापति शेरबहादुर देउवासँगको भेट अस्वीकार गर्नुभएको छ । भेट्न मानेनन्।
तर उहाँले कांग्रेसकै वरिष्ठ नेता रामचन्द्र पौडेलसँग भने विहीवार बिहान भेटेर कुराकानी गर्नुभएको छ ।
भरतपुरस्थित होटल सिरागचुलीमा भएको भेटमा रामचन्द्र र जगन्नाथबीच छोटो कुराकानी भएको हो। भेटवार्तामा जगन्नाथले मेयरमा उम्मेदवारी दिँदा प्रस्तावक रहेका कृष्णलाल सापकोटा र समर्थक रहेकी मीना खरेल र पूर्वसांसद भीमबहादुर श्रेष्ठलगायतको पनि उपस्थिति रहेको थियो ।
होटलकै कोठामा भएको बेक्रफाष्ट मिटिङमा सत्तागठबन्धनले बनाएको चुनावी तयारी तथा अनुगमन समितिका संयोजकसमेत रहेका रामचन्द्रले अहिले संविधान मिच्ने प्रयास भइरहेको र त्यस्तो षड्यन्त्र स्थानीय तहसम्मै रहेको बताउनुभएको थियो उहाँले संविधान र लोकतन्त्र बचाउनका निम्ति बनेको यो गठबन्धनलाई सहयोग गर्न जगन्नाथ र उहाँका समर्थक नेताहरुलाई आग्रह गर्नुभएको थियो ।
पौडेलको आग्रहपछि चिवन कांग्रेस पूर्वसभापतिसमेत रहनुभएका जगन्नाथका प्रस्तावक कृष्णलाल सापकोटाले कांग्रेस बचाउन र भरतपुरमा संगठन बलियो पार्नकै लागि जगन्नाथले यसपालि मेयर पदमा उम्मेदवारी दिएकोले फिर्ता नहुने जिकीर गर्नुभएको थियो । जगन्नाथले उम्मेदवारी दिनुभएको हो। यो पछि गएर कांग्रेसकै जगन्नाथको विजयले काँग्रेसकै हित हुने जिकिर गर्दै उहाँले जगन्नाथले स्वतन्त्र उम्मेदवारी दिएकोले अब फिर्ता गर भनेर नेताहरूले दबाब दिन नमिल्ने बताउनुभयो ।
रामचन्द्रले पटकपटक फोन गरेपछि मात्रै आफूहरू भेटका लागि आएको सापकोटाको भनाइ थियो। गठबन्धन गर्ने पार्टी निर्णयमा आफूहरुको सहमति नरहने उहाँले अडान दोहोर्याउनुभयो ।
बरू संघीय चुनावमा प्रचण्डलाई सहयोग गर्न सकिने सापकोटाको तर्क थियो । तर मेयरमा दोहोर्याएर रेनुलाई भोट हाल्न नसकिने उहाँको प्रष्टोक्ति थियो, ०७४ मा पनि कांग्रेसले मेयर छाडेको हो, सधैँ माओवादीलाई मेयर छाड्न सकिन्न।’
भेटमा जगन्नाथले पनि कांग्रेस बचाउन आफ्नो उम्मेदवारी रहेको बताउनुभयो ।
‘कांग्रेसलाई बचाउने यो अभियानमा म एक्लै छैन, साथीहरू र धेरैको समर्थन छ । अब म धेरै अघि बढेँ, उम्मेदवारी निस्कृय गर्न सकिन्न,’ उहाँको भनाइ थियो ।
जगन्नाथले रामचन्द्रलाई बरू सक्ने भए रेनुलाई मेयर उम्मेदवारबाट पछि हटाउन आग्रह गर्नुभएको थियो ।
वरिष्ठ नेता पौडेलसँगको छोटो कुराकानीपछि उहाँहरु चुनावी प्रचारका कार्यक्रममा जान ढिलाइ भयो भन्दै होटलबाट बाहिरिनुभएको थियो ।
भरतपुरमा सत्तागठबन्धनबाट माओवादीकी नेता रेनु दाहाल मेयर र कांग्रेस नेता चित्रसेन अधिकारी उपमेयर उम्मेदवार छन्।
तर कांग्रेसका पुराना नेता जगन्नाथले स्वतन्त्र उम्मदेवारी दर्ता गरेर चुनाव चिन्ह भुइँकटहर लिएर प्रचारमा जुटिसक्नुभएको छ ।
महानगरभित्र कांग्रेसको धेरै भोट रहेकोले थोरै भोट भएको माओवादीलाई मेयर नछाड्ने जगन्नाथ पक्षको दाबी छ ।
-1722510781.jpg)
