निर्वाचन सुरक्षा प्रबन्धमा कुनै कसुर बाँकी नराख्न सुरक्षा निकायका प्रमुखहरूलाई गृहमन्त्रीको निर्देशन

मूख्य समाचार

Home
मूख्य समाचार
निर्वाचन सुरक्षा प्रबन्धमा कुनै कसुर बाँकी नराख्न सुरक्षा निकायका प्रमुखहरूलाई गृहमन्त्रीको निर्देशन

निर्वाचन सुरक्षा प्रबन्धमा कुनै कसुर बाँकी नराख्न सुरक्षा निकायका प्रमुखहरूलाई गृहमन्त्रीको निर्देशन

सरलरेखा संवाददाता सोमबार, वैशाख १९, २०७९

काठमाडौँ । गृहमन्त्री बालकृष्ण खाणले वैशाख ३० मा हुने स्थानीय तह निर्वाचन शान्तिपूर्ण तरिकाले स्वच्छ, निष्पक्ष र भयरहित वातावरणमा सम्पन्न गर्न मिलाउनुपर्ने सुरक्षा प्रबन्धमा कुनै कसुर बाँकी नराख्न सुरक्षा निकायका प्रमुखहरूलाई निर्देशन दिनुभएको छ ।

सोमवार गृह मन्त्रालयमा बसेको केन्द्रीय सुरक्षा समिति बैठकमा आसन्न स्थानीय तह निर्वाचनको सुरक्षा प्रबन्धका लागि अहिलेसम्म भए गरेका कामको समीक्षा भएको गृह मन्त्रालयका प्रवक्ता फणिन्द्रमणि पोखरेलले जानकारी दिनुभयो ।

निर्वाचन प्रचार(प्रसारका क्रममा हुनसक्ने घटना न्यूनीकरणका विषयमा पनि बैठकमा छलफल भएको प्रवक्ता पोखरेलले बताउनुभयो। मन्त्री खाणले अहिलेसम्म निर्वाचन सुरक्षाका लागि भए गरेका काम प्रसंशायोग्य रहेको पनि बताउनुभयो ।

निर्वाचन समयमा अप्रिय घटना हुन नपाउन् भन्ने तर्फ सचेत रहन पनि उहाँले निर्देशन दिनुभयो । निर्वाचनमा आकस्मिक रूपमा र योजनाबद्ध झडपहरू पनि हुन सक्ने भन्दै त्यस विषयमा सचेत रहन र झडपबारे सूचना पाउँदाबित्तिकै सुरक्षा निकायले एकअर्काबीच समन्वयमा अगाडि बढ्न निर्देशन दिनुभयो । घटना भइहाले तत्काल बल प्रयोग गरेर स्थिति सामान्य पार्न सुरक्षा निकायका प्रमुख र गृह प्रशासनलाई निर्देशन दिनुभयो ।

बैठकमा सोमबारमात्रै पदबहाली गरेका नेपाल प्रहरीका महानिरीक्षक धिरजप्रताप सिंह र सशस्त्र प्रहरी बलका महानिरीक्षक राजु अर्याललाई समितिको नयाँ सदस्यका रूपमा स्वागत गरिएको थियो। मन्त्री खाणको अध्यक्षतामा भएको सुरक्षा समिति बैठकमा गृहसचिव टेकनारायण पाण्डे, निमित्त रक्षासचिव यज्ञप्रसाद ढुंगेल, नेपाली सेनाका रथी बालकृष्ण कार्की प्रहरी महानिरीक्षक सिंह, सशस्त्र प्रहरी महानिरीक्षक अर्याल, राष्ट्रिय अनुसन्धान विभागका प्रमुख यदुलाल खरेलको सहभागी हुनुहुन्थ्यो ।

प्रकाशित मिति: सोमबार, वैशाख १९, २०७९ १९:५४

प्रतिक्रिया दिनुहोस्