दलहरुको चुनाव केन्द्रीत गतिविधिसँगै कोरोना १९ को चौथो लहर फैलिने जोखिम र चिन्ता

सरल विशेष

Home
सरल विशेष
दलहरुको चुनाव केन्द्रीत गतिविधिसँगै कोरोना १९ को चौथो लहर फैलिने जोखिम र चिन्ता

दलहरुको चुनाव केन्द्रीत गतिविधिसँगै कोरोना १९ को चौथो लहर फैलिने जोखिम र चिन्ता

सरलरेखा संवाददाता सोमबार, वैशाख १९, २०७९

काठमाडौं । वैशाख ३० मा हुने स्थानीय तह निर्वाचनका लागि मत माग्दै विभिन्न दल र स्वतन्त्र उम्मेदवारहरु यतिखेर घरदैलो अभियानमा व्यस्त छन् । हुल बाँधेर मतदाताको घरदैलोमा पुगि उनीहरुले आ आफ्नो पक्षमा मत मागिरहेका छन् ।

तर यसरी हुल बाँधेर गरिने घरदैलो अभियानसँगै कोभिड १९ संक्रमण फेरि फैलिने चिन्ता बढेको छ । अधिकांश दलहरुले स्वास्थ्य सुरक्षाका उपायहरु नअपनाइ घरदैलो अभियान जस्ता राजनीतिक गतिविधिहरु गरेको पाइएकोले कोभिड संक्रमणको जोखिम बढेको स्वास्थ्य विज्ञहरु बताउछन् । विगतमा ठूला ठूला राजनीतिक जुलुश,र्याली र सभा कोभिडको दोस्रो र तेस्रो लहर फैलिनुका प्रमुख कारण रहेको सरुवा रोग विशेषज्ञ डा शेरहादुर पुनले बताउनुभयो । अहिले नजिकिदै गरेको स्थानीय तह निर्वाचन केन्द्रीत दलहरुको त्यस्तै गतिविधिले चिन्ता बढाएको उहाँको भनाइ छ । छिमेकी देश भारतमा अहिले दैनिक कोरोना संक्रमितको संख्या र मृतक बढ्दै गएको बेला नेपालमा पनि बेलैमा सतर्कता अपनाउनुपर्ने डा पुन बताउनुहुन्छ ।

गत वर्षको वैशाखमा कोरोनाको दोस्रो लहर फैलिनु अघि नेपालमा प्रतिनिधिसभा विघटन गर्ने तत्कालीन केपी शर्मा ओली सरकारको विरोधमा दलहरुका ठूला ठूला विरोध जुलुश, र्याली र आमसभा आयोजना गर्ने हडाबाजीमा दलहरु थिए ।
भारतमा पछिल्लो समय कोरोना संक्रमण फेरि तीव्र बनेको छ । पछिल्लो २४ घण्टामा त्यहाँ ३,६८८ जना संक्रमित थपिएका छन् भने ५० जनाको कोरोना संक्रमणका कारण ज्यान गएको छ । आगामी निर्वाचनमा मतदान गर्न भारतमा रहेका ठूलो संख्यामा नेपाली नेपाल फर्कने भएकोले संक्रमण बढ्ने चिन्ता बढेको छ । संक्रमक रोग विशेष डा जनक कोइरालाका अनुसार सामान्य व्यक्तिलाई कोरोनाको नयाँ भाइरसले गम्भीर विरामी नबनाए पनि वृद्ध,वृद्धा र गम्भीर रोगीहरुलाई बढी खतरा हुनेछ । त्यसैले राजनीतिक दलहरुले आफ्ना चुनाव केन्द्रीत गतिविधि गर्दा स्वास्थ्य सावधानी अपनाउन आवश्यक रहेको उहाँको भनाइ छ । अहिले भारतमा कोरोनाको ओमिक्रोन भेयिन्टको सबभ्रियन्ट बि.ए.२.१२.१ बढी सक्रिय रहेको पाइएको समाचारहरुमा उल्लेख छ ।

नेपालमा कोभिड संक्रमणको दोस्रो लहरमा डेल्टा भेरियन्टबाट ८ हजार बढीको मृत्यु भएको थियो । यस्तै ओमिक्रोन भेरियन्टका कारण फैलिएको तेस्रो लहरबाट पनि सयौं नेपालीले ज्यान गुमाएका थिए ।

कोरोनाको चौथो लहर फैलिने आशंकामा सरोकारवाला निकायलाई आवश्यक तयारी अवस्थामा रहन निर्देशन दिइसकिएको स्वास्थ्य मन्त्रालयका प्रवक्ता डा समीरकुमार अधिकारीले बताउनुभयो । यस्तै सर्वसाधारणलाई पनि स्वास्थ्य सुरक्षामा हेलचेक्राइ नगर्न अपिल गरिरहेको उहाँको भनाइ छ । स्वास्थ्य अधिकारीहरुले स्वास्थ्य निर्देशिकाहरु जस्तै सामाजिक दुरी कायम गर्ने, मास्क अनिवार्य लगाउने र हातलाई बेलाबेलामा साबुनपानीले धोएर स्यानिटाइज गर्न जोड दिएका छन् । उनीहरुले कोभिड १९ को सम्भावित जोखिम कम गर्न स्थानीय तह निर्वाचनका कार्यक्रमहरुलाई भौतिक रुपमा सञ्चालन नगरि सामाजिक सञ्जाल लगायतका प्लेटफर्महरु प्रयोग गर्न सुझाव दिएका छन् ।

प्रकाशित मिति: सोमबार, वैशाख १९, २०७९ १४:४८

प्रतिक्रिया दिनुहोस्