नेपालको हवाइ सेवा पुनः युरोपियन युनियनको कालोसूचीमा

आर्थिक पत्रिका

Home
आर्थिक पत्रिका
नेपालको हवाइ सेवा पुनः युरोपियन युनियनको कालोसूचीमा

नेपालको हवाइ सेवा पुनः युरोपियन युनियनको कालोसूचीमा

सरलरेखा संवाददाता बिहीबार, मंसिर १५, २०७९

काठमाडौं । युरोपियन युनियन (ईयू) ले नेपाली वायुयानलाई फेरि कालो सूचीमा राखेको छ ।

ईयूले नेपाललाई गम्भीर हवाई सुरक्षा चासोको सूचीमा फेरि निरन्तरता दिएको हो। उसले हवाई उड्डयन क्षेत्रको नियमनकारी र सेवाप्रदायक संस्था एउटै हुँदा स्वार्थ बाझिएर सुरक्षामा प्रश्न उठ्ने आरोप लगाएको छ।

एउटै संस्था नियमनकारी र सेवाप्रदायकको भूमिकामा रहँदासम्म कालोसूचीले निरन्तरता पाउने उसको भनाइ छ। ईयूले संस्थागत संरचना र सुधारमा जोड दिएको छ । ईयूले एयर सेफ्टी लिस्ट वर्षमा दुई पटक अपग्रेड गर्दै आएको छ ।

ईयूको अडिट टोलीले नेपाली वायुयानका हवाई सुरक्षाबारे यही अक्टोबर ६ देखि ८ सम्म स्थलगत अध्ययन गरेर फर्केको थियो । गत साता ईयूको बैठकले यही अध्ययनलाई आधार बनाएर एयर सेफ्टी लिस्ट अपटेड गर्ने क्रममा नेपाललाई कालोसूचीमा राख्दै निरन्तरता दिएको हो ।

यसअघि हवाई सेवाको नियमनकारी निकाय नेपाल नागरिक उड्डयन प्राधिकरणले पछिल्लो समय अन्तर्राष्ट्रिय नागरिक उड्डयन संगठन (आईकाओ) को अडिटबाट नेपालले हवाई सुरक्षा परिपालना मापदण्ड दरमा ७०.०१ नतिजा हासिल गरेकाले २०२२ को अन्त्यसम्ममा नेपाली वायुयान ईयूको गम्भीर सुरक्षा चासोको सूचीबाट हट्ने बताउँदै आएको थियो ।

प्रकाशित मिति: बिहीबार, मंसिर १५, २०७९ ०८:१९

प्रतिक्रिया दिनुहोस्